,
Lettre à Jacques-Philippe d'Orville, Groningen, 10 février 1739
Viro Clarissimo et Eruditissimo
Jacobo Philippo D'Orville
S.P.D.
Joannes Barbeyracius
Nihilne ergo, nisi funera tuorum, audiam? Ante annum circiter ereptam
tibi uxorem dilectissimam luxisti. Valde optabam, ut in solatium aliquid
laeti tibi accideret, de quo gratulari liceret. At vero hesterna die ad me
pervenit carmen, quo defletur fratris tui obitus, in ipso aetatis flore nuper
exstincti. Unde etiam intelligo, eo acerbiora tibi fata ejus esse, quod, praeter
communionem sanguinis, communium quoque studiorum societate tibi conjunctus
esset, raro admodum exemplo Musis deditus inter curas ejus vitae generis,
quo plerique omnes Mercurio tantum litare satagunt. In partem quoque
doloris ex novo hoc vulnere tibi orti animitus venio, Deum oro, ut, quot annos
de vita defuncti demsit, tuis, quam longissime productis, addat. Clarissimus
Collega Rossal, simul cum Carmine funebri, ad me transmisit ultimum Tomum
Observationum Miscellanearum , pro quo, et aliis quos nomine tuo accepi,
gratias maximas ago. Vale, Vir Clarissime, et me, ut facis, amare
perge. Dabam Groningae, a.d. 10 Februar. Ann. M.DCC.XXXIX.
