Transcription

Viro Clarissimo et Eruditissimo 
Theodoro Jansonio ab Almeloveen
S:P.D.
Joannes Barbeyracus.

Nullus dubitavi, Vir Clarissime, quin lubentissime quaecumque vel ipse
in manibus haberes, vel aliunde conciliare posses, futurae Lucretii Editioni
ornandae idonea, mecum communicare velles; in primis Tollianas schedas, quas
vehementer optabam. Quantopere Tibi me hoc oblato beneficio obstrinxeris,
satis eloqui nequeo: ast, quod possum, et Tibi et Auctori, so tempore gratum
animum pro virili significabo. Notas Viri Eximii ad apicem usque repraesentabo,
subjecto semper nomine Auctoris, si, ut spem facis jucundissimam, illas ad me
transmiseris. Schedas illas, et si quid aliud ad me curatum velis, dare potes Waesbergio,
tradendas D. de La Motte, homini amicissimo, qui Amstelodami degit, et Te, ni fallor,
meo nomine, praesentem compellavit. Per eum ad me tutissime pervenient, et
postquam descripsero, quod quamprimum licebit faciam, ad Te salves sospitesque
redibunt. De consilio Salmasii et Is. Vossii, scio: sed aliorum, quos Notas seu
Commentarios in Lucretium scripsisse, aut saltem promisisse memoras, ignoro: ideoque
lubens a te docebor. Lugdunum vestrum ad Clariss. Noodt scripsi, ut ejus opera
non solum Magni Casauboni notulas margini Edit. Gryphianae adscriptas, de quibus
loqueris, sed et alia quae in Bibliotheca Vossiana latent, consequar, ubi scio duos
Codd. Mss. extare, et Editionem Gryphanianam cum Mss. collatam manu Fr. Narsii et
Is. Vossii. Collationem Codicis Patavini, quem indicas, si qua ratione nancisci queam,
videbo. Bertrandus Montfauconius, quod per Illustrem Abbatem Bignonium rescivi,
ait Lucretii Mss. Codices rarissimos esse, et inter catalogos Bibliothecarum Italiae, quos
plurimos habet, se unicum tantum reperire, inter Codices Bibliothecae Vaticanae, qui
Reginae Christinae fuerunt. Parisiis Bibliotheca Regia nullos habet, sed tantum
Editionem Venetam A. 1495 (de qua nihil silet Clariss. Fabricius) manu Petri
Martelli innumeris lociis notatam, et quae forte, judice Boivinio, Marullum ipsum olim
dominum habuit. Extat ibi quoque Editio Giphaniana anni 1567. cum Dionysii
Lambini lituris et emendationibus, sed codex ille Libro primo et parte secundi
<1v> truncatus est. Schedula ex Anglia ad me transmissa monet Ms. Codicem Lucretii
in Bibliotheca Bodleiana servari, num. 3045. et octo ejusdem Poëtae Codd. Mss. extare in
Bibliotheca Medicea, pluteo 35.

Tuo nomine salutem dixi Clarissimo Vignolio nostro, qui non minus amicitiam
tuam exoptat, quam Tu illius, et obnixe ut Te resalutarem, me rogavit, in secessum
quasi rusticum non longe ab hac Urbe in aliquot menses proficiscens. Libentissime
tecum communicabit, si quid habeat quo te in pluribus Consularibus haerentem
juvare queat, aut si qua alia ratione ad Operis tui Chronologici novam Editionem ornandam
Tibi inservire valeat. Ad me modo, quamprimum licebit, mittas indiculum eorum
in quibus operam ejus Tibi utilem esse posse existimabis: responsum illius quam
celerrime potero ad Te pervenire curabo. Vale, Vir Celeberrime et Huma=
nissime, mihique, ut facis, favere perge, vel eo nomine quod Patruus mihi
quondam fuit, dum viveret in Gallia sua Artis Aesculapiae peritissimus habitus,
quamquam nullis umquam scriptis inclarescere voluerit. Dabam Berolini
VI Non. Maji MDCCX.

A Monsieur
Monsieur d'Almeloveen, Docteur en
Medecine et Professeur
A Harderwic